ពិពណ៌នាពីសៀវភៅ
វាមិនសំខាន់ទេថាពួកយើងនឹងស្គាល់គ្នាអាចមានឱកាសជួបគ្នាឬអត់។ រឿងដែលសំខាន់នោះគឺអ្នកនឹងអាចចងចាំបំណែកណាមួយនៃ “សំឡេងខ្សឹប” របស់ខ្ញុំដែលប៉ះដល់បេះដូងរបស់អ្នក។ គ្មាននរណាម្នាក់អាចនៅលើលើកទឹកចិត្តអ្នកគ្រប់ពេលវេលានោះទេ ព្រោះនៅពេលណាមួយ គ្រប់គ្នាគង់តែចាកចេញទៅដោយចៀសមិនបាន។ ដូច្នេះហើយទោះជាមិនអវត្តមានខ្ញុំក៏ដោយ “សំឡេងខ្សឹប” នឹងនៅតែស្ថិតជាមួយអ្នករាល់ពេលដែលអ្នកជួបបញ្ហាដូចបទនិពន្ធណាមួយរបស់ខ្ញុំដែរ។
“ជីវិតនេះ គឺពោរពេញទៅដោយបញ្ហាតែអ្នកត្រូវខ្សឹបប្រាប់ខ្លួនឯងថាបើគេឆ្លងកាត់បាន ខ្ញុំក៏អាចឆ្លងកាត់បានដូចគ្នា!”
អំពីអ្នកនិពន្ធ
កែវ សេងរដ្ឋា ជានិស្សិតវេជ្ជសាស្ត្រឯកទេសផ្នែកវះកាត់ទូទៅ និងប្រព័ន្ធរំលាយអាហារនៅសាកលវិទ្យាល័យវិទ្យាសាស្ត្រសុខាភិបាល។ រដ្ឋាជាកូនទោលក្នុងគ្រួសារ ដែលមានលោកឪពុកឈ្មោះ កែវ វង្សតារា និងអ្នកម្ដាយឈ្មោះ ច័ន្ទ សុគន្ធា។ លោកទាំងពីរសុទ្ធតែជាមន្ត្រីរាជការ។ រដ្ឋាបានរស់នៅក្នុងខេត្តកំពង់ឆ្នាំងដែលជាទឹកដីកំណើត និងរៀនសូត្រនៅទីនោះរហូតដល់ចប់បាក់ឌុបនៅឆ្នាំ ២០០៩ ទើបឡើងមកបន្តការសិក្សាថ្នាក់បរិញ្ញាបត្រនៅរាជធានីភ្នំពេញ។ ជាក្មេងដែលមានប្រវត្តិសិក្សាល្អ និងមានសមត្ថភាពម្នាក់។
រដ្ឋាបានទទួលអាហារូបករណ៍ថ្នាក់បរិញ្ញាបត្រវេជ្ជសាស្ត្រពីសាកលវិទ្យាល័យសុខាភិបាល និងអាហារូបករណ៍ថ្នាក់បរិញ្ញាបត្រអក្សរសាស្ត្រអង់គ្លេសពីសាកលវិទ្យាល័យពុទ្ធិសាស្ត្រ ហើយបានបញ្ចប់ការសិក្សាទាំងពីរជំនាញនេះដំណាលគ្នាក្នុងឆ្នាំ ២០១៥។
ដោយសារស្រឡាញ់ការសរសេរ និងមានក្ដីស្រមៃចង់ក្លាយជាអ្នកនិពន្ធនោះ រដ្ឋាបានចាប់ផ្ដើមប្រឡូកចូលក្នុងវិស័យតែងនិពន្ធចាប់តាំងពីចុងឆ្នាំ ២០១៧ ហើយរហូតមកដល់ពេលនេះ ស្នាដៃសំខាន់ៗដែលធ្លាប់បោះពុម្ពផ្សាយរួមមាន កំណាព្យ "ទឹកដីភ្លើងខ្យល់" ក្នុងសៀវភៅ មន្តទឹកខ្មៅ ២០១៧ ; រឿងខ្លី "បេះដូងពុក" ក្នុងសៀវភៅព្រៃរំដួល ២០១៨ និងសៀវភៅ “សំឡេងខ្សឹប” ដែលចេញផ្សាយដោយសៀវភៅជីវិត ក្នុងឆ្នាំ ២០១៩ នេះ។ ជាងនេះទៅទៀត រដ្ឋាធ្លាប់បានទទួលជយលាភីផ្នែកតែងនិពន្ធផងដែរ ក្នុងនោះរួមមាន កំណាព្យ "សុរិយា" ពានរង្វាន់លេខ ៣ មហោស្រពអក្សរសិល្ប៍ខ្មែរលើកទីពីរ ខេត្តបាត់ដំបង ២០១៨ និងប្រលោមលោក "បេសកកម្មបេះដូង" ចំណាត់ថ្នាក់លេខ ៤ ពានរង្វាន់លោកលីធាមតេង ២០១៨។
នៅពេលទំនេរ រដ្ឋាចូលចិត្តអានសៀវភៅ ដើរកម្សាន្ត ថតរូប ស្ដាប់ចម្រៀង និងច្រៀងជាដើម ហើយកីឡាដែលចូលចិត្តបំផុតនោះគឺ វាយសី និងហែលទឹក។
អ្នកផ្គត់ផ្គង់
- សៀវភៅជីវិត
ប្រភេទ
- វិធីសាស្ត្រអភិវឌ្ឍខ្លួនឯង
ភាសា
- ខ្មែរ
ការនិពន្ធ
- កែវ សេងរដ្ធា
ព័ត៌មានលំអិតពីសៀវភៅ
- 303
- 2019
- 1
- 9789924922070
- ក្រដាសសៀវភៅ
- A6
- កាកអំពៅ